Ig has im „alte“ Johr doch no gschafft und ha s’Brichtli über Euses Probe-Weekend uf em Schelte chli zu Papier brocht…
Bim schriebä si mir scho wieder vieli luschtigi Sache dure Kopf und ha miessä schmunzle…
Viel Spass bim lesä !!!
Endlich gits au no dr detailierti Bricht vo Eusem legendäre Probe Weekend, s’Schränzerli hets halt chli streng gha….
Am Samstig bi ig denn mit Sack und Pack am viertel vor eis uf em grosse Parklpatz z’Laufe stange. Im Gepäck alles was es für so e Wucheend brucht: Schloofsack, Kleider, Nessecaire, öbis gege Durst….. ah jo natürlich dörf s Instrument au nid fehle!
Wo mir denn acho si, d’Schloofplätz bezoge und eus chli igrichtet hei, isch es au scho gli losgange…
No schnell Instrumentli öle und Zytig sueche.
Z’erscht hei mir eus natürlich guet igspielt, damit mir jo guet und lang möge spielä…
Abwechligswies mit Gsamtprobe und Registerprobe hei mir denn bis zum Nachtessä alles gä…
S Schränzerli und die restliche Gugge si wieder einmol mehr mit emene wunderbare Essä verwöhnt worde ! Viele herzliche Dangg an derä Stell im Frape und sinere Chuchi-Mannschaft…
Nach em Chuchi-Dienst hets denn wieder gheisse: Vorwärts Marsch !!! Es het nomol e Gsamtprob gä…
Denn endlich isch s’Spielä für am Samstig dure gsi und mir hei chöne afoh Zocke !!!
Es hei sich denn gli e paar Laufeschränzer gfunge wo e huffe 20-erli mitgnoh hei und die au hei welä isetztä, verlierä oder gwünnä…..
Dr Zockertisch isch parat gmacht worde, mit allem was derzue g’hört ! Und los ischs gange…
S’Schränzerli zieht sich jetzt zrugg und verzellt nüt me, was so alles abgange isch! Lueget d’Föteli derzue a….und wer nid derbi gsi isch…schad und het öbis verpasst !
Viel z’frieh isch denn am Sunntig wieder Morge gsi und s’Morgeessä isch scho wieder uf em Tisch gstange.
Es het wohrschinlich dr Eint oder Ander derbi gha wo noni so möge het und gern no chli wär go liegä ???
S’Schränzerli meint aber, dass das emene richitge Laufeschränzer nüt usmacht.
Nach e bitzli Meckere und lange Gsichter, isch es denn uf d’Marschprob gange.
Wie’s tönt het, das lömmer jetzt eifach mol, aber die früschi Luft het bestimmt guet do! Und am Schluss het fascht niemer meh well ihne goh, will d’Sunne doch so super schiene het.
Wieter gange isch denn nomol mit Gsamtprobe und Registerprobe, bevors denn scho fast wieder vorbi gsi isch.
Mit vereintä Kräft hei mir denn wieder ufgruumt, putzt und e ordentlichs Lager hingerloh…
A derä Stell seit s’Schränzerli im Michi ganz bsungers Danggschön für si tolle Isatz mit em Itrag is Gästebuech !!!
So, alles isch wieder in de Auto verstaut, Adieu gseit het me au allne und isch uf e Heiweg gange.
S’Schränzerli het e chli e astrengends, aber total lässigs Wucheend hinger sich!!!
Es möcht sich nomol bi allne bedangge wo chrampft und gschafft hei und freut sich scho wieder uf s’nächschte Johr J